Psalms 147

1Dumisani uThixo.

Kuhle kangakanani ukuhlabela indumiso kuNkulunkulu wethu,
kumnandi njalo kufanele ukumbonga!

2 UThixo uyalakha iJerusalema;
aqoqe labo abahlakazekileyo baka-Israyeli.
3Uyabathoba abadabukileyo enhliziyweni
abophe amanxeba abo.
4Umisile ubunengi bezinkanyezi
aziqambe leyo laleyo ngamabizo.
5INkosi yethu inkulu, njalo makhulu amandla ayo;
ukuzwisisa kwayo kakulamkhawulo.
6 UThixo uyabasekela abathobekileyo kodwa
abaphosele phansi ababi.

7Hlabelani kuThixo ngokubonga;
litshaye amachacho kuNkulunkulu wethu.

8Uyembesa umkhathi ngamayezi;
awuphe umhlaba izulu
njalo akhulise utshani ezintabeni.
9Unika inkomo utshani
aphe lamatsiyane amawabayi nxa esekhala.

10Ukuthokoza kwakhe kakukho emandleni ebhiza,
loba injabulo yakhe ekuqineni kwemilenze yomuntu;
11 UThixo uthokoza ngalabo abamesabayo,
ababeka ithemba labo ethandweni lwakhe olungaphuthiyo.

12Umbabaze uThixo, Oh Jerusalema;
dumisa uNkulunkulu wakho, Oh Ziyoni.

13Ngoba uyaqinisa imigoqo yamasango akho,
abusise labantu bakho ngaphakathi kwakho.
14Wenza ukuthula emikhawulweni yelizwe lakho.
Njalo ukusuthisa ngamabele amahle kakhulu.

15Uthumela umlayo wakhe emhlabeni;
ilizwi lakhe ligijima masinyane.
16Wendlala ungqwaqwane njengoboya bezimvu
ahaze iliqhwa njengomlotha.
17Uphosela phansi isiqhotho sakhe njengamatshe.
Ngubani ongamelana lomfutho wakhe olomqando na?
18Uthumela ilizwi lakhe konke kuncibilike;
aphephethise umoya wakhe amanzi ageleze.

19Ulivezile ilizwi lakhe kuJakhobe,
imithetho yakhe lezahlulelo ku-Israyeli.
20Lokhu kazange akwenzele esinye isizwe;
kaziyazi imithetho yakhe.

Dumisani uThixo.